Муус устар 27 күнүгэр Саха сирэ биир сүрүн государственнай бырааһынньыгынан – Республика күнүн бэлиэтиир. 1922 сыллаахха бу күн Саха Автономиятын тэрийэр туһунан декретка илии баттаммыта. Онтон 70 сыл ааспытын кэннэ бу күн сайдыы суолун саҥа кирбиитигэр киирбиппитин туоһулаан Саха Республикатын Конституциятын ылыныллыбыта. Бу саха омугар улахан ситиһии, саҥа сайдыыга төһүү күүс буолбута. Маны ситиһэргэ саха чулуу уолаттара Платон Ойуунускай, Максим Аммосов, Исидор Барахов, Степан Аржаков, Василий Никифоров-Күлүмнүүр, Алексей Кулаковскай, Гавриил Ксенофонтов уонна да атыттар кылааттара сүҥкэн.
Бу күнү көрсө Саһыл нэһилиэгэр төрүт өбүгэлэртэн төрүттэнэн тэнийбит, уһун үйэлэртэн удьуорданан сайдыбыт Урааҥхай саха уус удьуордарын утумнаан араас таҥастан сиэдэрэй симэхтэринэн, уран оҥоһуктарынан, күндү араас түүлээҕинэн киэргэнэн, бу өрөгөйдөөх үтүө күммүтүн көрсө арыаллаһан хаамыстылар.
Саһыл орто оскуолатын 8-ыс кылаас үөрэнээччитин Лилиана Берзюкованы Кабардино Балкария Нальчик куоратыгар баран «Первенство России 2025 по мас-рестлингу» күрэхтэһэн 2-ис миэстэ буолан ситиһиилээх-хотуулаах кэлэн нэһилиэгин дьонун үөртэ. Ону чиэстээн Саһыл нэһилиэгин аҕа баһылыга Дмитрий Александрович Тимофеев администрация аатыттан Лилианаҕа уонна кинини дьарыктаабыт тренерыгар Иннокентий Иннокентьевич Заровняевка махтал суруктарын уонна харчынан сертификаттары туттарда. Үөрэнэр оскуолатын аатыттан директор Зинаида Николаевна Пугачева уонна оскуола оҕолоро чиэстээн туран бэлэхтэрин ууннулар. Лилиана эбээтэ Ирина Петровна Варламова улахан махталларын тириэрдэн туран Иннокентий Иннокентьевичка сэмэй бэлэхтэрин бэлэхтээтилэр.
Ону таһынан Дмитрий Александрович Зинаида Николаевна Пугачеваҕа уонна Сардана Константиновна Сидороваҕа “За вклад повышение статуса отца и укрепление института семьи” удостоверениятын уонна мэтээллэрин туттарда.
Бу күн мааны ыалдьыттарга анаан сыанаҕа тахсан бэйэлэрин ырыаларын бэлэхтээтилэр: “Далбара” ырыа ансаамбыла, «Үнүгэсчээн» оҕо фольклорнай бөлөҕө, Виктория Павлова, Ньургуйаана Булдакова, Арсений Елизаров. Саха омук саамай тэнийбит, дьону түмэр бастыҥ уҥкүүтүнэн, түмэл оһуохайы таһаарда Василий Саввич Неустроев.
Саһыл нэһилиэгин олохтоох библиотекатыгар үөрэнээччилэргэ оонньуу буолан ааста. Оҕолор 5 түһүмэхтэн турар оонньууга кыттыыны ыллылар. «Викторина», «Суруйааччы-айымньыта», «Суруйааччы-псевдонимнара», «Саха сирин оройуоннара, куораттара», «Томпо оройуонун нэһилиэктэрэ».
Төрөөбүт – үөскээбит Республикабыт саргыта сайыннын, дьол — саргы туһугар дойдубут өссө чэчирээн, тупса турдун, үйэлэр тухары умнуллубакка, олохтоно туруохтун!
Айталина Елизарова
